公視新聞網 https://news.pts.org.tw/article/594064
兼顧經濟.家庭擔頭重 "城男舊事"助爸爸敨放心事
林思皓 莊沛文/台北報導 發布時間：2022-08-08 19:15 更新時間：2022-08-08 19:57
https://www.youtube.com/watch?v=zDc8Mlrz81A
今仔日是父親節，有人力資源公司公佈調查，發現真濟爸爸因為經濟壓力真大，也想欲分
擔照顧囡仔的責任煞毋敢請育嬰假。台北市一个關心男性的組織「城男舊事」表示，in平
常時攏有提供男性心理諮詢的時間，歡迎所有爸爸去揣in講心事。
8月初8父親節，慶祝的時陣，嘛愛來關心咱阿爸的壓力。今年36歲的Nick，有三个囡仔，
佮in某兩个人的薪水加起來有十萬，毋過生活仝款過甲真硬篤。
爸爸 Nick表示：「先無拍算兼差，先共老本食食咧，以後等囡仔較大漢矣，若是欲趁較
濟的時陣，到時陣才來兼差就好。」
毋過毋是逐个人攏有老本通食。根據人力資源公司的調查，一个家庭若飼一个囡仔，逐個
月至少愛有8萬8的收入。
人力資源公司公關總監 陳尹柔表示：「若是以一到三月份實質性薪資來看，干焦四萬一
千外爾爾，兩个加起來其實猶無夠這个水準，等於只有八萬兩千外。」
一寡仔關心男性佮性別議題的團體表示，佇愈來愈注重性別平等的家庭分工內底，其實有
愈來愈濟少年爸爸願意分擔照顧囡仔的責任，毋過經濟壓力予in毋敢共工課放落來，請育
嬰假。
婦女權益促進發展基金會組長 陳慧怡表示：「其實這馬新一代的男性爸爸有意願嘛希望
會使參與，但是這个經濟的結構怎樣去突破，是規个大環境的影響，佔真大的部份。」
城男舊事心驛站組長 林奕辰表示：「育囝上大的困難就是陪伴囡仔的時間無夠，佇陪囡
仔的時間無夠這部份，就反映講in的工時傷長。」
城男舊事表示，in平常時攏有提供男性預約心理諮詢的時間，十月嘛會發起已婚男性的情
緒支持性團體，歡迎有需求的爸爸去揣in敨放心事。