https://news.pts.org.tw/article/593566
神腦國際營收逐年加 員工薪水煞無3萬引爭議
郭柏均 張育睿/臺北報導 發布時間：2022-08-04 19:15 更新時間：2022-08-04 19:52
https://www.youtube.com/watch?v=vt3A67xXnxc
國內上大的手機仔通路代理商神腦國際，上大的股東就是中華電信。毋過神腦工會指出，
神腦國際的營收逐年提懸，第一線人員的底薪、全勤獎金佮其他補貼，攏總加起來煞無到
三萬。怹8月初4到中華電信總公司門口抗議，要求全體人員的底薪攏愛對三萬起跳。
口號：「國營轉投資！tshuā頭舞低薪！」
不滿薪水傷低等等的問題，神腦工會初四來到神腦公司大股東、中華電信總公司的門口抗
議。In指出，神腦國際舊年營收310億、淨利5.9億，最近逐年攏提高；但是第一線門市人
員的底薪、全勤、閣有其他補貼等等，總加起來煞干焦兩萬八到兩萬九左右。
神腦工會理事長 陳政國表示：「自中華電信入股神腦以後，神腦員工的福利佮待遇，十
年之間煞愈來愈薄，甚至有老員工的薪資攏無變化，中華電信家己的廣告詞，in永遠行佇
上頭前，著，in永遠行佇上頭前
先外包閣來承攬，所以這敢是國營事業應該做的代誌，
新北市產業總工會理事長 洪清福表示：「若是今仔日這間公司無趁錢，阮做這款要求是
咱勞工痟貪，但是這間公司趁遮濟。」
工會嘛指出，這兩年神腦有十幾間門市收起來，員工真驚會無頭路，另外in嘛要求神腦停
止對工會的司法訴訟報復。中華電信佇現場有出面，嘛共工會的訴求收落來，表示會轉去
傳達。
中華電信公共關係科科長 郭明初表示：「神腦本身公司治理的部份，這點阮需要尊重，
身為神腦公司的大股東，阮有義務共今仔日各位的訴求，傳達予神腦公司的高層。」
中華電信表示，會予神腦一寡仔意見，研議敢有法度落實工會的訴求。神腦透過文字回應
，in有完備的調薪制度，會看考績決定薪資的調整，毋過袂照工會的要求進行「全體底薪
三萬」的齊頭式調整。門市收起來嘛有妥當安排員工繼續工作。佮工會理事長的官司，訴
訟猶咧行，會尊重未來司法的判決。