https://news.pts.org.tw/article/589204
全國女性里長占無2成 婦團辦培訓班協助參政
洪敏真 莊沛文 / 台北報導 發布時間：2022-07-07 19:15 更新時間：2022-07-07 19:30
https://www.youtube.com/watch?v=SIDYFF64Sk0
年底選舉賰4個月，除了縣市首長，候選人上濟的就是基層的村長、里長，計共7734席。
毋過女性佔無兩成，甚至欲到三分一攏是1个人出來選，等於無競爭對手。台灣婦女團體
全國聯合會，今年已經是第四年辦村里長的培訓班，希望懸女性的參政比率，也予基層
政治參與換新換新。
佇大街小巷佮里民盤撋的查某里長黃麗伃，才81年次，已經佇新北市三重區永安里服務4
年，當初就是參加台灣婦女團體全聯會女性村里長培訓班，決心出來為民服務，黃麗伃
講佮里民跋感情，上好的方式就是講台語。
新北市三重區永安里里長 黃麗伃表示，「我若看著人我就會好喙，我就會叫姨媽、阿伯
按呢。咱咧做代誌、咱咧協調代誌的時陣就較方便。」
台北市信義區泰和里里長參選人 連婉彤表示，「阮以前老里長是查晡的，做足濟屆的，
毋過我是感覺女性的力量就是愛予逐家看著。」
這幾年台灣女性政治人物比例增加，予人看做是性別平權大進步，不過若看數字，查某立
委佔四成外，直轄縣市市議員三成外，抑若村里長干焦16.6%，無夠兩成，根據中選會統
計，今年年底村里長有7734席次，毋過女性現任的名額少，村里長閣較有倚三分之一是同
額競選，等於無競爭對手，婦全會認為女性比例愛至少有三成，才通改變生態。
台灣婦女團體全國聯合會理事長 陳秀峯表示，「經過培訓了後，伊的性別敏感度佮社區
關懷敏感度攏會當提升，會當真有效率或者是真溫暖。」
為著跳脫往過村里長予人講縛柱仔跤、顧泡茶無作穡的印象，袂少民間團體也出里長手冊
，提出村里長新角色新定位的思考。
完全村里長使用手冊發行人 王時思表示，「阮就是向望有較濟少年人會當投入選舉，予
民主較深化。」
女性扞頭，對村里做起，民團向望建構閣較濟為民主、為公共的基層政治新思維，予村里
長文化有新點點的一面。