https://news.pts.org.tw/article/589018
霹靂黃文擇紀念展 國家電影中心開展望傳承
郭柏均 張育睿/新北報導 發布時間：2022-07-06 19:15 更新時間：2022-07-06 19:42
https://www.youtube.com/watch?v=T_fRTNAzaxs
布袋戲藝師黃文擇頂個月過身。伊佮大兄黃文章所創立的霹靂國際多媒體公司，這陣收集
伊在生進前的影像、創作、物品等等，佇國家電影中心為伊舉辦紀念展覽，今仔日開幕。
師傅搭配布袋戲藝師黃文擇生前的配音弄尪仔，為八音才子黃文擇的紀念展覽開幕。黃文
擇佇6月12過身，霹靂國際多媒體公司，這陣收集伊過去佇布袋戲界拍拚的影像、創作、
佮物品等等，舉辦互動式的紀念展覽、初6正式開幕。佮伊做陣創立霹靂的大兄黃文章，
講著這个小弟猶是嚨喉滇。
霹靂國際多媒體董事長黃文章講，「這種所謂有才能的人，這種國寶級的，世界上是無濟
的，一人配音是無簡單的。濟人配音就收集逐家的優點就無一定，但是我想一人配音的上
懸境界，應該就是阮小弟黃文擇。」
講著傳承，霹靂表示，自舊年就開始培訓新生代的配音員，雖然可能猶無法度佮黃文擇相
比並，但是配音是無問題的、嘛當咧沓沓仔成長。In也當咧規劃成立基金會，向望會使集
合各界的力量，做伙推廣布袋戲。
黃文章表示，「性命有限但是精神會使永續，需要眾人力量，干焦靠一間公司抑是幾个人
，是無法度的。阮拜訪有意願的人，欲共同成立這个基金會，為台灣布袋戲推廣努力。」
總統蔡英文、文化部長李永得也佇初5到展覽現場參觀致意。霹靂表示，除了展覽，佇展
期內也有《素還真》、《聖石傳說》兩齣布袋戲電影佇各地重新放影，予各界追思八音才
子黃文擇。