https://news.pts.org.tw/article/572184
公寓大廈管理條例修法 危險建物強制設管委會
郭柏均 謝季潾 / 台北報導 發布時間：2022-03-17 19:15 更新時間：2022-03-17 19:39
https://www.youtube.com/watch?v=pj2_AgpwIHo
行政院進前通過「公寓大廈管理條例」修法，只要認定有危險的公寓大樓，愛佇時間內成
立管理委員會、或者是推選管理負責人，若無會罰4萬到20萬 。早起民間團體召開記者會
表示，支持處罰手段，毋過也著愛有獎勵機制來協助推動。
台北市的南機場公寓，會使看著有真濟違建，因為起佇1963年，已經欲六十冬，結構佮
消防安全等等攏有真濟問題，嘛攏無設管委會會使解決。
南機場居民 李小姐：「因為這毋是大樓，路嘛是不止仔大條，猶是OK啦。」
南機場居民 黃先生：「里長去解決啊！(里長解決喔？按呢敢有夠？)無夠哪會有法度，
會淡薄仔驚驚啦！」
行政院提出《公寓大廈管理條例》的修法草案，針對安全有疑慮的公寓大樓，欲強制in成
立管委會猶是管理負責人，無會罰4萬到20萬，而且無改善會閣再處罰。民間團體認為，
手段除了處罰以外，嘛應該愛有輔導獎勵機制，才會使有效推動。嘛應該予管委會處理公
共安全、消防安全的權力，避免拄著區分所有權人會議卡關，安全就出現閬縫的情形。
地政士公會全聯會榮譽理事長 林旺根：「管委會申報只是一个形式，伊愛長期運作，我
感覺這个部份是中央嘛好、地方嘛好，應該輔導in永續長期運作。」
崔媽媽基金會執行長 呂秉怡：「若是有主管機關經過公消安檢查，有予要求限期改善的
項目，管委會會使以主管機關要求的公文抑是決定，先做公消安的處理，才閣來向區權會
報備。」
營建署表示，草案有規劃相關配套輔導措施，嘛增訂地方政府應該自行辦理、抑是委託機
構，來輔導危險建物成立管理組織。針對按怎認定是毋是危險的公寓大樓，會配合法案審
議進度，佮地方政府來共同研議。