https://news.pts.org.tw/article/547351
傳奇廖添丁成做手機遊戲 拍電動兼學臺語
鄭雅文 林郁凱 / 臺北報導 發佈時間：2021-10-01 19:15 更新時間：2021-10-01 19:46
https://i.imgur.com/z7GifoJ.jpg
講添丁，說添丁，添丁傳奇說不盡。臺灣民間故事內地的民族英雄，毋是別人，正是廖添
丁。過去有歌仔冊、唸歌、電影，攏咧做廖添丁的故事。這碼也有廖添丁的電動遊戲。毋
但有臺語版本，甚至字幕也有臺文字喔。
傳奇人物廖添丁用báng-gà的風格出場，背景扌臭轉去到20世紀初的大稻埕，綴畫面入去
遊戲世界。
遊戲公司主管，王峻偉表示：「團隊的人攏佮意台灣故事，攏佮意動作遊戲，阮就去揣台
灣故事內底，上會曉動作的，就是台灣義賊廖添丁這个形象，也是各種文化衝擊的時代。
」
動作猛掠，腰縖一條紅跤巾，是廖添丁對付日本警察抑是官兵的一項武器，遊戲公司用關
卡、予耍的人會當利用遊戲手扶來控制闖關、拍魔王，像有關卡魔王就是參考歷史人物川
島芳子，而且為著營造彼个時代的環境，介面也特別用台語口白對話。
遊戲製作人，林秉舒表示：「彼當陣應該就是台語佮日語為主，廖添丁主角這爿一定攏是
講台語，做到遮就咧想，你遊戲的介面，閣有彼寡家私頭的說明，是毋是應該嘛做伙用台
文。」
無論對付敵人的步數抑是武器、像畫面這就有說明是剉樟仔用的家私，地景等等也有台灣
街仔路、市場、日本時代台北城的氛圍。
遊戲公司管理部執行長，王峻偉表示：「就是彼陣有去揣這實際的地點，親像台北的城隍
廟，閣有三井倉庫、北門町這寡，阮真正攏是照伊的外貌，去共相對的地理位置做入來。
」
遊戲團隊用兩冬外的時間設計遊戲，按算佇11月初上市，也因為設計團隊內底有成員咧學
台文，才想講假使有耍的人對台文有興趣，無的確遊戲也通有另外的教育意義。