https://news.pts.org.tw/article/545744
中秋風俗各地無仝 但總包含祖先智慧.歷史文化
洪敏真 張育睿 / 台北報導 發佈時間：2021-09-21 19:15 更新時間：2021-09-21 19:40
https://youtu.be/0IMI1BcN9nw
今仔日中秋月圓人團圓，毋但食月餅，過去農業社會靠天食飯，作穡人攏會佇田頭田尾拜
土地公、答謝土地公的看顧。今仔日嘛是土地公生，有人嘛會佇入秋開始做平安戲謝神，
中秋嘛會使講是咱的感恩節。
削開的竹仔內面，櫼規疊的土地公金，閣來香囥橫的，才閣共竹仔插佇田頭，這是佇民間
得欲失傳的土地公拐。
《台灣的土地公》作者王健旺(2021.03.14)：「春天的時陣會共伊拜，一直到秋天收成的
時，會閣再來拜一擺，這足趣味。這想法就是講，因為土地公會替咱巡田水、巡田園，所
以是毋是講，伊老歲仔人就予伊一支枴仔，多謝土地公對咱的護持、對咱的照顧，咱也予
伊好行路。」
也因為中秋是土地公大生日，有人會佇入秋開始做平安戲謝天，也會提米做的麻糬拜土地
公，予伊食甜甜希望黏錢來。俗語話講：「年驚中秋、人驚四九」，意思是講一年當中，
上驚搪著中秋，因為中秋過，一年就又閣欲過矣，抑若人上驚過49歲，因為人生若像過一
半去。所以中秋也有擲繡球招親和聽香的風俗，就是望年底前會使有好歸宿。
民俗亂彈執行編輯溫宗翰：「你若講你猶未嫁、你也猶未娶，你著愛準備香佇厝裡拜拜，
拜好順這个香的方向，你共伊探過去；你若探過去了後，聽著的第一句話若是講好話，通
常咱就會感覺講，我的姻緣咧欲到位矣。」
問姻緣以外，中秋也猶閣有跋狀元文化、希望金榜題名。
民俗亂彈執行編輯溫宗翰：「過去講秋尾考試、講科舉考試，攏是佇中秋節的時陣，所以
過去嘛有跋狀元，後來嘛變做是咱這馬看會著的跋餅。」
民俗專家溫宗翰表示，雖罔時代改變，傳統風俗漸漸流失，不過中秋就若像是咱的感恩節
，人民謝天謝地的精神到今猶是有，也值得咱進一步探討了解。