https://news.pts.org.tw/article/544503
限制女性夜間工作違憲 學者:勞工恐驚失保障
郭柏均 張育睿 / 台北報導 發佈時間：2021-09-13 19:15 更新時間：2021-09-13 19:49
https://youtu.be/MpV5bMme9jY
進前大法官有解說:因為性別平等，限制女性勞工佇半暝做工課是違憲的。有學者認為:毋
管查埔查某，佇半暝在上班，攏是一種傷害。應該共法條改做「無分性別」攏愛受著保障
才著。莫因為性別平等，煞變做傷害勞工的一種方式。
原底勞基法49條第1項規定，除非經過工會抑是勞資會議同意，佇一定的配套措施之下，
雇主才會當要求女性勞工佇暗時做工課。毋過頂個月二十司法院大法官認為限制女性佇夜
間做工課，礙著性別平等，宣布違憲。今仔日佇立法院引起學者佮工會團體的討論。
文化大學法律系教授邱駿彥表示：「假使你認為對女性勞工夜間工作的各種規範，變成是
對男性勞工的無平等的時，按呢為啥物伊是去共女性勞工的保護提掉，毋是講共男性勞工
嘛入來保護」
邱駿彥認為，暗時做工課無分性別對身體攏有影響，建議應該共宣布違憲的49條第1項，
改作無分性別攏受著保障。另外這號解釋（kái-sik）也講著，因為個人的差異，這種保
護無一定適合透過工會猶是勞資會議來決定，嘛有學者煩惱按呢的宣布可能會減弱工會的
力量。
陽明交通大學科技法律學院副教授邱羽凡指出：「勞工敢有可能共雇主講『本人無同意你
的工作規則，請你莫叫我暗時做工課』，請問勞工敢敢講這句話？因為講袂出來才需要49
條。為啥物社會無思考雇主敢有盡協商的義務，顛倒檢討勞工敢有予工會侵害」
學者指出，勞工雖然有無同意暗時做工課的權利，但是實務上，真罕得有勞工敢拒絕，所
以才需要工會的保護。司法院民事廳是講，針對大法官的釋憲，因為職權無仝、無法度做
回應，但是相信釋字807是未來修法的開始。