https://news.pts.org.tw/article/540123
南投1農場引進"粉黛亂子草" 農委會:有害應清除
邱植培 王龍韜 / 南投報導 發佈時間：2021-08-15 19:15 更新時間：2021-08-15 21:57
南投集集有農場引進1種外來種，號做粉黛亂子草，因為開花的時陣規片看去攏粉紅色的
是媠甲，民間嘛共號做粉紅仔草。毋過這種粉紅仔草是真gâu生湠，恐驚危害在地生態。
目前農委會已共粉紅仔草列做有害生物，要求農場業者著愛共薅扌穴捔。
看著毛毛的粉紅仔草佇風中搖來搖去，是誠浪漫，唌濟濟的民眾來遮翕相，這種粉紅色的
草仔，學名號做"粉黛亂子草"，南投集集有農場的業者進口來種，毋過農委會認為這是外
來有害生物，愛共薅扌穴捔，民眾攏感覺真無彩。
民眾表示：「遮是誠媠，若薅挕扌束，就會減一个景點，逐家攏會當來遮翕相，因為這馬
的網衝有影真濟。」
也有民眾講：「當然猶是會感覺可惜，減一个會當翕相的景點，毋過若是為著環境好，猶
是希望愛共薅扌穴捔。」
農委會防檢局認為粉黛亂子草，真gâu生湠，嘛真韌命，入侵風險真懸，所以共列入去"
有害生物的清單"，而且今年6月有發公文予地方政府，愛防止有人偷偷仔種，阻擋粉紅仔
草生湠，毋過農場業者強調講，他佇政府公告進前就引進，而且也無湠開的現象，希望會
當召開公聽會理清敢是有害。
粉紅仔草業者戴宗權表示：「我希望政府單位，欲謹慎嘛愛參考資料，毋通因為環保人士
毋捌，稍微抗議或者是檢舉，政府單位若像是，加一事不如減一事仝款，會當帶動地方觀
光的物件，欲按呢共毀掉。」
南投縣農業處長陳瑞慶表示：「是先請業者家己清除，後手業者若無配合，才閣進一步共
業者輔導，看敢是會當佇某一个期限內，共遮的有害的作物處理掉。」
南投縣農業處表示，會要求業者家己移除，毋過法令上，認為中央法規公告猶有無周至的
所在，會向農委會林務局佮農委會防檢局建議，制定閣較明確的作業規範，避免縣市政府
輔導業者的時陣出現爭議。