公視新聞網 https://news.pts.org.tw/article/693066
「拉斐爾到梵谷」52幅正本圖 臺南奇美5/2開展
發布時間：2024-05-01 19:15 更新時間：2024-05-02 08:35
李晨宇 / 台南採訪報導
https://www.youtube.com/watch?v=tl4kDcNwI2o
英國國家藝廊頭一擺和臺南奇美博物館合作，推出四個月的展覽<對拉斐爾到梵谷>，攏總
展覽50位大師正本的圖畫，無論是文藝復興抑是印象派的攏總有，tshuā觀眾先來去欣賞
。（此則新聞標題、導言、內文皆為臺語文。）
蝴蝶佇草埔咧飛，畫甲真活，予看的人感受著大自然的美好，這幅是真出名的畫家梵谷
1890年的創作；另一幅予杜定咬傷的查埔囡仔，是義大利畫家卡拉瓦喬以戲劇性參光線做
特點落去畫的。這本成愛佇英國國家藝廊才通看著，這回佮意藝術鄉親真有福氣，200冬
來in頭擺來臺灣奇美博物館做展出，來遮一逝，就會當共50位大師的正本看予齊。
本展策展代表蔡海廣，「第一个是有關文藝復興初期，佮盛期的一寡圖，第二个單元是南
方，佮北方巴洛克的藝術圖畫，第三單元是18到19世紀，一个壯遊風潮帶來的影像，佮英
國畫圖的作品，第四單元就是，逐家定聽著的印象派，真濟大師的作品。」
這擺國際大展，包括有拉斐爾、雷諾瓦、高更佮梵谷等大師，計總用52幅原作，來呈現13
世紀到20世紀西洋藝術的重要時期。英國國家藝廊館長指出，in整合濟濟經典作品佇咧遮
，打造甲若像縮小版的國家藝廊。五月初十是英國館方兩百週年，IN向望透過遮的多元的
藝術精華，予逐家有獨一無二的感受。
英國國家藝廊館長加百列．芬納迪，「過去幾冬真濟亞洲的觀眾，對阮國家藝廊佮西方的
繪畫，漸漸咧增加興趣，所以阮想欲回應逐家，另外嘛因為將欲慶祝兩百週年，規个藝廊
阮大規模咧做整理，所以嘛才共有機會，共上重要的收藏品帶出來亞洲巡迴。」
亞洲巡迴特展上尾站來到臺灣，這場西洋畫展初二正式對外開展，展期到九月初一，紲落
來展品IN會閣提轉去倫敦做展示，嘛留下歷史性的一刻。
洪家馨/編輯