公視新聞網 https://news.pts.org.tw/article/681259
正月初九天公生 拜古錢牽仔條.象徵財運攏來
發布時間：2024-02-18 19:15 更新時間：2024-02-18 19:46
https://www.youtube.com/watch?v=QJOKt12Mb3c
初九天公生，拜天公是民間重要的傳統，民眾除了會攢素食三牲等等來祭拜，佇彰化鹿港
閣會拜古錢造型的牽仔條，除了代表財運，嘛有人講古錢圖樣代表月娘的變化，一條就是
一個月。
市場內人滿四界，攏是欲來買拜天公的物件；除了天公金、補運金、花跤錢，閣有素三牲
、紅龜粿等等、但是彰化鹿港閣會拜一項物件，用秫米落做，食起來親像糕仔，頂面有古
錢的圖樣，號做牽仔條
糕餅店老闆鄭富瑋表示：「古錢的圖樣，代表財運的意思，12條 逐個月攏會使有財運，
生理好的意思，若是閏月的時陣就13條。」
舊曆正月初九是玉皇大帝生日，鹿港人真重視拜天公，一般民眾會佇初八就開始準備，初
九子時祭拜，拜天公分做頂下桌，頂桌拜素的，若有臊的牲禮會囥下桌
糕餅店老闆娘謝秀櫻表示：「鹿港的拜天公是佮別位的所在較無仝，咱鹿港的拜天公會攢
果、粽、素三牲，甜碗、菜碗。」
鹿港文史工作者李宗學表示：「鹿港拜天公是鹿港人非常重視的一个活動，所以攏會攢足
濟豐沛的物件拜天公，非常的重視 所以有小過年的這種講法。」
過去鹿港家家戶戶會佇門跤口祭拜，因為時代變化，袂少儀式簡單化，也有民眾會選擇去
廟裡拜拜，但是這陣有少年輩依照古禮拜天公，希望保留傳統祭拜的民俗文化，也來體現
台灣人謝天，感恩惜福的謙卑精神。
陳玟芯/編輯