公視新聞：http://goo.gl/ArP09j
【世界台】南非唱退出 國際刑事法院再弱化
2015/10/18
文 / 周盈成
以下這篇短文，是用教育部公布的台語標準用字寫成。一點都不難，認得中文、略通
台語， 就懂八九成了。還有聲音檔唸給你聽，許多字詞也超連結到教育部《臺灣閩
南語常用詞辭典》。看世界新聞，兼學台語文，就是【世界台 ~ Sè-kài Tâi】啦！
聲音檔：https://soundcloud.com/infactnews/skt151018-saicc-mp3
南非共和國最近唱聲欲退出國際刑事法院(ICC)。若成真，對原底就真歹追求的國際
正義，閣是一擺嚴重的打擊。南非自稱是不滿ICC攏針對非洲領袖，這其實是講袂通
的理由。
Sudan的總統Omar al-Bashir因為Darfur的屠殺，被ICC通緝。有簽署《羅馬規約》來
成立ICC的世界各國，包括南非，照講有義務合作掠通緝犯。毋過Bashir今年6月去南
非出席非洲聯盟的高峰會，南非政府做伊自由來去。ICC要求南非政府解說，後者頂
禮拜煞講欲退出ICC。
南非總統Jacob Zuma講，「在非洲領袖看來，ICC真有偏見，干焦對非洲人有興趣。
」 官員閣講，南非猶是維持伊加入ICC彼當初的人權價值，是ICC家己「迷失方向」
。
敢有道理？南非網路媒體《每日異議》的一篇分析講無影：ICC目前為止追訴的八个
非洲的案件內底，有兩个是聯合國安全理事會移送的，包括Sudan這案；四个是當事
國要求ICC協助的；干焦兩个是檢察官發動的。另外，uì亞洲到中南美洲，ICC 嘛當
咧調查七个國家的狀況。
作者Saul Musker講，主張南非退出ICC的人，無人講著這八个非洲的案件內底，有佗
一件是無應該起訴的。南非的這个新立場誠悲哀，濟濟國家暴政之下的受害者，予政
治動作掰去邊仔。
文章講，目前有 123个會員國的ICC，凡勢已經是全世界制度設計上周密、上公平的
司法體系。伊確實有真濟不足，比論講一寡侵害人權上嚴重的國家攏無參加，包括中
國佮美國；比論講，ICC無實際的執法權，真濟國家閣無欲合作鬥掠通緝犯。毋過這
拄好表示ICC需要強化，毋是抵制。若是南非真正退出，Musker講，可能有一大非
洲國家綴伊行，「這間法院的根底會崩去」。
南非政府毋插ICC、放掉Bashir的做法，也已經被本國法院裁決是違反國內法，造成
行政佮司法對立的危機。是按怎執政者欲按呢做？原因是區域政治。
Canada的分析家Mark Kersten講，南非想欲做一个全球的道德領袖，同時閣欲做非洲
的區域強權，這兩个角色有衝突，這馬看來，伊是較要緊欲khiú倚伊的非洲厝邊。
若是聯合國安理會改革，增加常任理事國，南非真想欲提著代表非洲的一席，這需要
眾非洲國家共伊伨。
Kersten講，這个捌出過Nelson Mandela、終結種族隔離的國家，人權紀錄毋捌真正
好，道德名聲嘛已經禾黑去。目前這个事件，反映出伊沒法度好勢處理伊的全球佮區域
目標之間的平衡。